Siglir tar il cuntegn

Header

cuntegn

Runda d'experts – coronavirus Mathys: «La situaziun na va betg en la direcziun giavischada»

3'150 infecziuns novas cun il coronavirus ha l'Uffizi federal per sanadad BAG annunzià entaifer in di. Latiers vegnan dus ulteriurs mortoris en connex cun Covid-19. 62 persunas han stuì ir da nov en l'ospital. Tenor SRF-Data è la media d'infecziuns novas da set dis tar 2'019 – 85% dapli che l'emna passada.

En media èn 12 da 100 tests positivs. En il Grischun èn 46 persunas s'infectadas da nov cun il virus. Actualmain sa chattan 14 persunas en ospitals grischuns pervi da corona. Duas da quellas èn sin ina staziun intensiva e dovran agid da respirar.

Tenor il manader da la secziun superaziun da crisas dal BAG, Patrick Mathys, giaja il svilup en ina direcziun inquietanta:

La situaziun na va betg en la direcziun giavischada. Las ospitalisaziuns van puspè ad aut. Dapi l'entschatta fanadur èn las entradas en ils ospitals diesch giadas pli autas.
Autur: Patrick Mathys

Rodund 70 pertschient dals letgs intensivs èn occupads. La cumpart da pazients e pazientas da Covid saja quater giadas pli auta che anc il fanadur.

Confederaziun dovra damain vaccin che empustà

Per il mument èn passa 50 pertschient da la populaziun vaccinà cumplainamain. Là nua che la gronda part da la populaziun saja vaccinada, saja era il dumber d'infecziuns pli bass. Tenor Mathys saja vinavant da persvader la populaziun da sa laschar vaccinar.

La dumonda per vaccin da la vart dals chantuns saja vegnida pli pitschna. L'emna passada sajan ils chantuns vegnids infurmads che la Confederaziun dovria be la mesadad dals bun in milliun vaccins per l'avust. I dettia dentant vinavant avunda vaccins per mintgin e mintgina che veglia sa laschar vaccinar.

Presidenta da la task force formulescha novas finamiras

Enfin qua saja la finamira stada da proteger la populaziun da novas infecziuns. Ussa stoppian ins adattar las finamiras. Las novas trais finamiras principalas sajan tenor Tanja Stadler:

  • Evitar ch'il sectur da sanadad vegnia surchargià.
  • Proteger ils uffants sut 12 onns.
  • Proteger persunas cun in schlet sistem d'immunitad.

Il vaccinar resta dentant vinavant in punct central en il cumbat cunter la pandemia.

video
Tanja Stadler: «I va per quant che nus pudain anc pretender dal sectur da sanadad»
Or da News-Clip dals 17.08.2021.
laschar ir

RTR novitads 15:00

Artitgels legids il pli savens

Scrollar a sanestra Scrollar a dretga