Siglir tar il cuntegn

Header

cuntegn

Runda d'experts «La prova generala da Pasca è gartegiada»

Igl è quasi daventà rutina: Experts da la Confederaziun han infurmà davart il stan actual en il cumbat cunter il coronavirus e davart mesiras per ils differents secturs. Il pli impurtant da la runda dad oz:

La prova generala da Pasca saja gartegiada. Da quest avis è Stefan Blättler, il president da la Conferenza dals cumandants da las polizias chantunalas. La gronda part da la populaziun saja sa tegnida vid las mesiras da cumportament. Quai malgrà la bell'aura da la fin d'emna. Er ils proxims dis vegnia la polizia a mussar preschientscha. Tscherts lieus attirian dentant vinavant blers visitaders. En quest connex ha Blättler anc ina giada appellà a la populaziun da desister da viadis che na sajan betg necessaris e da restar a chasa. Per retegnair tanta glieud sco pussaivel da viagiar sur Pasca en il Tessin endrizzia la polizia ina plazza da controlla a Göschenen e lantschia ina campagna da sensibilisar.

video
Stefan Blättler davart la situaziun da la fin d'emna passada
Or da News-Clip dals 07.04.2020.
laschar ir

Crisa anc betg surmuntada

Plinavant ha Daniel Koch dal BAG avertì ch'il punct culminant da la crisa na saja anc betg surmuntà. Il mument na saja anc betg cler, cura che las mesiras da protecziun possian vegnir schluccadas.

Bainprest repatrià tuts che vulan turnar

L'acziun da repatriament ha entant cuntanschì il punct culminant. 4'600 persunas haja la Svizra sgulà enavos en il pajais cun sgols spezials. Las destinaziuns las pli impurtantas sajan cuvridas. Ils blers Svizzers hajan organisà sez lur return u cun l'agid dal Departament federal d'affars exteriurs, ha ditg Hans-Peter Lenz da l'EDA. El ha annunzià che l'acziun da repatriament giaja bainprest a fin. Actualmain sa chattian anc in pèr millis Svizzers en l'exteriur, stima l'EDA. Blers da quels na sajan dentant betg s'annunziads.

video
Hans-Peter Lenz davart las repatriaziuns
Or da News-Clip dals 07.04.2020.
laschar ir

RTR novitads 15:00

Artitgels legids il pli savens

Ir a sanester Ir a dretg