Er oz ha ina runda d'experts infurmà en connex cun il stan actual en il cumbat cunter il coronavirus en Svizra.
- Tenor il BAG èsi anc memia baud da far prognosas segiras.
- La polizia supplitgescha da desister da viadis betg necessaris da Pasca.
- En connex cun il «contact tracing» datti in'applicaziun europeica.
Daniel Koch dal BAG ha infurmà davart las cifras actualas. I saja anc memia baud da prognostitgar sco la pandemia sa sviluppeschia las proximas emnas. Dentant discuteschia l'Uffizi federal da sanadad gia las strategias da l'avegnir. I saja uss anc memia baud da schluccar las mesiras da cumportament. La Confederaziun surlavuria sia strategia da far tests. Quai ensemen cun ils chantuns.
Scienza motivada da sa gidar
Matthias Egger infurmescha davart la nova task force «Covid-19» da la Confederaziun. Blers scienziads sajan motivads da gidar a surmuntar questa crisa. La task force consista da totalmain nov gruppas d'experts.
«Stai a chasa sur Pasca»
Tenor Stefan Blättler da la Conferenza dals cumandants da las polizias chantunalas èsi essenzial da sa tegnair vid las reglas da cumportament er da bell'aura. Quai er en vista als dis da festa. La polizia rinforzia sia preschientscha en la publicitad. Blättler appellescha da desister da viadis che na sajan betg necessaris. Ils chantuns Grischun e Tessin han pir dacurt appellà a giasts e possessurs da segundas abitaziuns da betg vegnir sur Pastga e las vacanzas da primavaira.
App «Contact tracing»
Tenor Matthias Egger datti in'applicaziun per la collavuraziun europeica. Cun tecnologia da bluetooth giaja da guardar nua ch'i dettia fullas da persunas. I saja pussaivel da chargiar giu questa applicaziun sin basa voluntara. Il mument stoppian però anc diversas dumondas en connex cun la protecziun da datas vegnir scleridas. Perquai stoppian ins anc spetgar, avant ch'i saja pussaivel da metter en funcziun questa applicaziun.
