Il directur da la Viafier retica è vegnì tractà en las medias sco pussaivel successur dad Andreas Meyer. Envers RTR ha Renato Fasciati dentant confermà, ch'el haja ier ed oz gì divers discurs e telefons. Cunquai ch'el saja pir dapi trais onns directur da la Viafier retica e cunquai che quella lavur al fetschia grond plaschair, veglia el dentant restar en Grischun. El sa sentia dentant onurà, ch'el saja vegnì tractà sco pussaivel successur.
Sin la dumonda tgi ch'el vesia sco proxim schef da las Viafiers federalas, n'entra l'um da 44 onns betg. El na sa participeschia betg a speculaziuns. Il cussegl administrativ da l'SBB ha temp fin la fin da l'onn da chattar in successur per Andreas Meyer.
Experientscha tar la SBB
Renato Fasciati ha lavurà var quatter onns tar las Viafiers federalas. L'onn 2007 ha el gì la funcziun da manar projects, ils onns 2008 fin 2011 è el stà schef da la partiziun svilup da SBB Cargo. Avant ch'el è vegnì directur da la Viafier retica è el stà directur da la Zentralbahn.
RR novitads 17:00
