Il 2019 saja atgnamain stà in fitg bun onn per las cassas da pensiun, scriva la cumissiun en ses rapport annual. En media hajan ellas fatg ina rendita netta da passa 10% ed hajan uschia era pudì augmentar lur grad da garanzia sin bunamain 112%, la fin da l’onn passà.
Pervia dal coronavirus e sias consequenzas hajan ellas dentant gist puspè pers quellas reservas. La fin d’avrigl hajan las cassas da pensiun anc nudà en media in grad da garanzia d'anc bun 106%. La situaziun a las bursas restia dentant difficila. Sch’i gartegia da limitar las consequenzas negativas che la crisa ha sin l’economia sajan las pli bleras cassas da pensiun dentant ablas da supportar quai , scriva la cumissiun.
Il pli grond problem saja dentant la tariffa da conversiun minimala da 6,8% che saja anc adina memia auta. Qua dovri urgentamain ina refurma, concluda la cumissiun.
