Siglir tar il cuntegn

Header

cuntegn

Schluccada da mesiras Guy Parmelin fa speranza a la gastronomia

Il minister d'economia n'excluda betg ch'er ustarias pon avrir las proximas emnas. Quai dependia dentant co la situaziun sa sviluppia las proximas emnas, ha ditg Guy Parmelin a la «Sonntagszeitung» e «Le Matin Dimanche».

purtret da guy parmelin
Legenda: Keystone

Il Cussegl federal possia giuditgar mintg'emna da nov la situaziun. Ins stoppia dentant drizzar l'avertura tenor las cundiziuns da la sanadad. Ma natiralmain saja impurtant per las persunas, da puspè pudair lavurar e da vegnir giuadora. Er ils problems psichics da l'isolaziun u da la tema per l'agen affar na possian ins betg sutvalitar.

Parmelin suppona che las restricziuns pervi dal coronavirus vegnian a restar anc in lung temp.

La glieud e las interpresas ston fin in tschert punct, emprender a viver cun las consequenzas da la crisa da corona.
Autur: Guy ParmelinMinister d'economia

Pir cura che la Svizra haja in vaccin, vegnian las restricziuns probabel puspè a svanir cumplet.

La pressiun da politichers da vegnir encunter als gastronoms, resta entant auta. Dasper la PPS s'expriman er exponents da la PCD e da la PLD per avrir bainspert ils ischs da las ustarias. Sche las reglas d'igiena e da distanza vegnian resguardadas, saja in'avertura mez matg desiderabla.

Dividendas malgrà lavur curta

Parmelin è s'exprimì critic davart interpresas che han annunzià lavur curta ma pajan tuttina ora dividendas. I na dettia qua bain nagina decisiun dal Cussegl federal, ma el è da l'avis ch'interpresas duessan qua plitost sa retegnair. «Quai è in nausch segn», ha Parmelin avertì envers las duas gasettas.

Sche el sez haja fatg in test da corona u betg, n'ha Parmelin betg vulì dir. Quai saja fitg privat. El saja dentant sa tegnì bain vid las mesiras d'igiena e da tegnair distanza. Quai er en vista ad els cussegliers federals e ch'els na veglian betg infectar in l'auter.

Ord l'archiv:

video
Gastronoms teman per lur existenza
Or da Telesguard dals 17.04.2020.
laschar ir

La strategia d'exit dal Cussegl federal na prevesa anc nagin termin fix per la gastronomia:

Grafica schluccadas
Legenda: RTR

RTR novitads 10:00

Artitgels legids il pli savens

Ir a sanester Ir a dretg