Durant la crisa da corona han ils magisters e las magistras betg cuntanschì divers da lur scolars cun l'instrucziun a distanza. Quai è il resultat dal Barometer da scola che la Scola auta da pedagogia dal chantun Zug ha fatg en Svizra, Germania ed Austria.
14 % dals collavuraturs da scolas han inditgà che 10% dals scolars e las scolaras na sajan betg stadas cuntanschibels via internet. Per 12% dals dumandads èn 15 fin 20% dals scolars betg stads cuntanschibels a moda digitala.
Ulteriurs 14% han schizunt declerà ch'els n'hajan betg pudì contactar culs meds digitals tranter 25 e 50% dals scolars. E tar 8% dals dumandads è la situaziun stada anc mendra. Tar quels n'èsi betg stà pussaivel da cuntanscher 50 fin 100% dals scolars e las scolaras via internet.
Il pli savens vegn communitgà per e-mail
Per la communicaziun cun ils scolars dovran las scolas per la pli gronda part e-mail, numnadamain en 66% dals cas, suandà da notizias e discurs via telefon, pagina d'internet da la scola e plattafurmas online sco Moodle.
Meglras notas per Svizra ed Austria
Il studi mussa plinavant ch'i dat areguard la scolaziun a distanza grondas differenzas tranter ils trais pajas. Uschia para las scolas en Germania d'esser main bain equipadas per far ina instrucziun online. Be 24% dals impiegada da scola en Germania han inditgà dad avair ina infrastructura adattada per far scola a distanza. En l'Austria han 54% dals dumandads valità l'infrastructura suffizienta ed en Svizra 57%.
Da l'autra vart reflectescha la situaziun tecnica da las scolas er l'engaschi dals scolars. Uschia han 34% dals collavuraturs da scolas en Germania inditgà ch'ils uffants lavuran a chasa activ vi da la materia da scola. En Austria percunter han 70% dals dumandads inditgà quai ed en Svizra 61%.
