La populaziun en Svizra crescha vinavant, ed uschia era il basegn per scolasts e scolastas. Quai scriva l'Uffizi federal da statistica en ina communicaziun. L'uffizi quinta cun 6% dapli scolastas e scolasts en la scola obligatorica fin il 2031. Quai munta in augment da 3800 plazzas sin stgalim primar e 2300 sin livel secundar.
Las scolas autas pedagogicas na tanschan betg
Calculà cun quellas e quels che van en pensiun, resulta in basegn da scolar 43'000 fin a 47'000 novs scolasts sin stgalim primar da 2022 fin 2031. Las scolas autas pedagogicas da la Svizra pon en quest temp probablamain scolar radund 34'000 persunas. La differenza possian ins per part gulivar cun scolastas d'auters stgalims, scolasts da l'ester u persunas ch'èn anc en scolaziun. Sin livel secundar quintan ins cun in basegn da 26'000 fin 29'000 scolastas, dentant na pon ins betg far prognosas detagliadas, pervia da la gronda varia da roms e scolaziuns.
In indizi positiv saja che 90% da las scolastas e scolasts dal 2015 èn era tschintg onns pli tard anc adina emploiadas en ina scola. Ed era 61% da las mammas turnan entaifer quatter onns puspè enavos e lavuran sco scolasta.
Or da l'archiv
Davart il basegn da persunal ha er il Forum d'econimia dal Grischun fatg in studi. Quel prognostitgescha ina gronda mancanzas da persunal ils proxims decennis.
