Actualmain cumpra blera glieud second hand. Quai conferman er las manadras ed ils manadras da butias en il Grischun, Miriam Unger («stoffwechsel-Secondhand & Schmuckes», Cuira), Sanna Giovanoli («Tschent Moda Secondhand», Cuira) e Lilo Giuri («Lilos Second Hand Shop», Tavau) sco era Lucrezia Berther («La Trucca»). Berher è presidenta da l'uniun da dunnas che maina ina butia da second hand a Glion.
Bleras dunnas din ch'ellas vegliamo pli cumprar second hand.
La vestgadira vegn retratga da differents lieus. «La Trucca» a Glion vegn tenor Lucrezia Berther emplenida cun vestgadira da donaziuns e dad ina bursa da vestgadira da Zumikon. Las ulteriuras dunnas retiran lur vestgadira da glieud privata che survegn lura ina part dal gudogn.
Lucrezia Berther raquinta che la clientella saja fitg diversa. Sanna Giovanoli e Lilo Giuri na pon betg porscher vestgadira d'umens or da motivs da plazs e purschida, ma manegian che la dumonda fissia avant maun. Sco motivs per cumprar second hand numnan las dunnas persistenza, finanzas e marveglias. Betg tut la vestgadira saja però tuttina dumandada.
A Tavau è vestgadira sportiva dumandada. Vestgadira memia eleganta e da design na marscha betg bain.
Lucrezia Berther manegia ch'ella era l'entschatta surstada che vestgadira d'uffants n'è betg uschè dumandada. Ina che sa fatschenta en spezial cun vestgadira per uffants è la collavuratura da la bursa d'artitgels d'uffants a Cuira, Claudia Caviezel. Tenor sias experientschas portia la glieud gugent vestgadira d'uffants a la bursa, ma cumpria pli pauc gugent. Savens possia mo circa la mesadad da la vestgadira vegnir vendida ad ina bursa. La raschun saja che la vestgadira en butias convenziunalas saja per part schizunt pli favuraivla.
