La Posta ha testà sia infrastructura d'informatica e laschà attatgar aposta ses radund 300 servetschs d'internet da radund 150 hackers – quai durant 24 uras. Ella è stada ina da las miras da la conferenza da hacking internaziunala a Paris da la fin d'emna passada.
Ils hackers han chattà 22 puncts flaivels – 1 serius ed 1 critic, ha communitgà la Posta:
- Il punct flaivel critic pertutgia in servetsch da localisaziun per pacs ch'èn ids a perder che collavuraturas e collavuraturs da la Posta dovran. Malgrà che quest sistem è intern, han ils hackers pudì entrar.
- Il punct flaivel serius pertutga il Webtransfer che metta a disposiziun grondas quantitads da datas per telechargiar. Ils hackers hajan pudì entrar e trametter mails da phishing a collavuraturas e collavuraturs da la posta.
Tenor il schef d'infurmaziun da la Posta Marcel Zumbühl n'èn 22 puncts chattads betg fitg bler. 150 dals hackers hajan stuì conceder che las mesiras da segirezza tar la Posta sajan per la gronda part bunas. Tals tests da l'infrastructura e ses mecanissems da protecziun fetschia la Posta regularmain. Quai senza periclitar las datas da clientas e clients, sincerescha Zumbühl.
video
Phishing – in privel surtut tar Black Friday's, però era uschiglio
Or da Giuventetgna dals 25.11.2021.
laschar ir. Durada: 1 minuta 8 Secundas.