Ad ina simpatisanta da la gruppa da terror Stadi Islamic SI retira la Svizra il dretg da burgais. La dunna da 30 onns ch'abitava en la Svizra franzosa er ida l'onn 2016 cun dus uffants en la Siria. Là ha ella maridà in aderent da la gruppa da terror e survegnì in terz uffant. La dunna è era burgaisa da la Frantscha e da la Tunesia. La dunna viva entant cun ses trais uffants en in champ d'internament en la Siria dal Nord.
Pir segund cas dapi il 1947
Quai scriva il Tages Anzeiger Online sin basa d'in avis dal secretariat da stadi per migraziun SEM en il Fegl uffizial federal. Quai saja, suenter in sumegliant cas il settember da quest onn, pir la segunda gida dapi il 1947 che la Svizra abgiuditgescha ad insatgi il dretg da burgais. La dunna pertutgada ha dentant anc la pussaivladad da far recurs tar il Tribunal administrativ federal a Son Gagl cunter questa decisiun.
Il SEM dastga retrair a burgais dubels il dretg da burgais svizzer. Quai dentant sulet sche quella persuna ha donnegià ils interess u il renum da la Svizra e cunquai er la segirezza dal pajais, scriva il SEM en ina communicaziun.
Ord l'archiv
Il secretariat da stadi per migraziun SEM ha – per l’emprima giada insumma – retratg ad in burgais dubel il dretg da burgais svizzer.
RTR novitads 09:00