Quai mussa il cudesch annual per la qualitad da las medias ch'è vegnì publitgà dal Center da perscrutaziun per la publicitad e societad (Fög) da l'Universitad da Turitg. Quel mussa plinavant che la situaziun economica da bleras medias svizras è sa pegiurada durant la pandemia. Midar quai possia sin il pli il stadi.
I sa mussa pli e pli fitg che schurnalissem da qualitad è be da finanziar cun sustegn da medias direct.
Tenor ina retschertga representativa fatga dal Fög approvan 37% ch'il stadi sustegn medias privatas, 37% èn encunter e 26% èn indecis. Gia la fin da l'onn 2020 aveva ina retschertga dal Fög mussà che blers vesan «Fake News» sco grond fin fitg grond problem. Medias sozialas (62%), medias alternativas (39%), portals da video (36%) ed apps da messenger (28%) sajan las funtaunas prinzipalas per quellas novitads faussas. 61% dals participants e participantas dal studi consulteschan medias schurnalisticas per verifitgar quellas novitads.
La qualitad da las medias svizras saja tenor il studi stabila, las medias da boulevard han pudì sa meglierar online. La concentraziun dal cuntegn saja s'augmentada vinavant en la Svizra tudestga. Vul dir la publicaziun d'artitgels identics en plirs mediums.