Areguard la plurilinguitad e la promoziun da las minoritads haja Cassis menziunà las stentas che las cuminanzas linguisticas sajan represchentadas a moda equilibrada en l’administraziun federala, communitgescha il Departament federal d’affars exteriurs EDA. Cun il project «Piccolo Erasmus» vegnia promovì dapi in onn il barat da collavuraturs chantunals dal Grischun e dal Tessin cun persunal da l'EDA.
Tematicas actualas sco la guerra en l’Ucraina, la migraziun e la crisa d’energia ha Cassis era discutà cun las regenzas chantunalas. Per il Grischun èn las dumondas areguard eventualas stretgas d'energia in dals focus, sco il president da la regenza Marcus Caduff ha manegià envers RTR.
Silsuenter èn las relaziuns cun l’Italia anc vegnidas tractadas. Il president da la Confederaziun ha tranter auter menziunà la cunvegna en elavuraziun, che duai reglar co duaniers e duanieras han da pajar taglia en il futur.
