Suenter il Cussegl federal ed il Cussegl naziunal recumonda ussa era il Cussegl dals chantuns in Na a l'iniziativa, cun 32 encunter 12 vuschs. Era la cuntraproposta indirecta dal Cussegl federal, ch'il Cussegl naziunal aveva anc modifitgà, n'ha gì paucas schanzas.
Questa ha il Cussegl dals chantuns refusà cun 25 a 18 vuschs. L'iniziativa pretenda da crear dapli surfatscha biodiversa e dapli daners publics per la diversitad da las spezias.
Da laschar enavos rument duai dentant esser scumandà en l'entira Svizra. Quai prevesa ina part da la revisiun da la lescha da la protecziun da l'ambient, ch'omaduas chombras han approvà. La votaziun en chaussa suonda anc.
Il scumond è ina part da la revisiun, ch'ha la finamira da rinforzar l'economia circulara. Ina retschertga da l'Uffizi federal da l'ambient ha mussà, che blera rauba che po anc vegnir duvrada, sa tschenta en il rument en il mument.
