Siglir tar il cuntegn

Header

cuntegn

Sessiun da dunnas è a fin Meglra protecziun cunter violaziun ed egualitad en professiun

La sessiun da las dunnas a Berna pretenda ina midada en il dretg penal sexual. Las participantas da la sessiun han approvà ina moziun che pretenda, ch'il prinzipi da conses vegnia francà en la lescha penala – quai per protegier meglier dunnas che vegnian violadas. Tgi che ignorescha in «Na», u segns nunverbals dal visavi, n'è betg exnum culpabel d'ina violaziun, u d'in act sexual sfurzà. Quai duaja ussa sa midar.

Ellas sperian sin grond sustegn per pudair dar in signal e per sustegnair pertutgadas da violenza sexuala. Per acts sexuals impunibels duai in «Gea» esser la premissa.

Igl è temp che nus renconuschin che sex senza consentiment è violaziun.
Autur: Noemi Grütter copresidenta da l'uniun «Sanadad sexuala»

Er pretendan las dunnas, ch'il fatg da violaziun vegnia formulà neutral areguard las schlattainas. Da preschent na po nagin vegnir sentenzià pervia da violaziun, sche l'unfrenda è in um.

Medemas schanzas en vita professiunala

Il Cussegl federal duai ensemen cun ils chantuns e las vischnancas stgaffir in fond per ina buna tgira d'uffants. Il fond duai segirar a lunga vista che la tgira d'uffants saja garantida tras plazzas qualifitgadas e che omadus geniturs possian egualmain persequitar ina carriera professiunala.

Plinavant duain fatschentas cun dapli che 50 persunas emploiadas stuair far transparent las pajas. Quai betg sco previs en la lescha fin 2032, mabain senza scadenza.

RTR novitads 14:00

Artitgels legids il pli savens