Ina dad ellas è Luana Bergamin. L’anteriura sportista da Lai ha tegnì in pled per Rumantsch a la sessiun da las dunnas sco pledadra da la cumissiun per la digitalisaziun. Era privat s’engascha Luana Bergamin per dapli egualitad. Ella è co-presidenta d’ina organisaziun che collia dunnas en il sectur da sport. Plinavant s’engascha ella per dapli dunnas en funcziuns da cader en il sport. Ella sez è vegnida elegida quest onn sco nova presidenta per la cuppa mundiala da skis a Lai.
Egualitad anc betg cuntanschida
Questa sessiun da las dunnas en la Chasa federala è la segunda. L’emprima ha gì lieu dal 1991. Igl èn ils pleds da la cristiandemocrata Josi Meier che restan enavos da l'emprima sessiun da las dunnas:
Avant 20 onns vulev’ins tegnair enavos nus cun il slogan « La dunna tutga a chasa ! ». Nus avain duvrà onns enfin che nus avain chapì endretg la frasa. Uss avain nus finalmain interiurisà quella frasa cun agid da la generaziun giuvna. Natiralmain che nus tutgainsa en chasa: En chasa da vischnanca – en Chasa federala!
Era sch'il parlament federal è daventà pli feminin dapli il 1991, èn las dunnas anc adina en la minoritad. L’egualitad tranter umens e dunnas n’è anc adina betg realitad en Svizra. Uschia scriva l’organisaziun da dunnas Alliance F che las decisiuns politicas vegnan prendidas per la gronda part dad umens. En tut ils gremis politics nua ch'i vegnan prendidas decisiuns impurtantas, èn las dunnas anc adina ina minoritad.
Dretg da vuschar per las dunnas
Sco terz ultim pajais en Europa ha la Svizra introducì dal 1971 il dretg da vuschar e votar per las dunnas. Quest onn èn quai 50 onns. Cun differentas acziuns, sco per exempel cun in spectacul sin la plazza federala è il giubileum vegni festivà.
Organisada vegn la sessiun da las dunnas da l’Organisaziun svizra da dunnas alliance F, la Cumissiun federala per dumondas da las dunnas CFDD, las Dunnas protestantas en Svizra DPS, l’Uniun da las puras svizras UPS, la Societad d’utilitad publica da las dunnas svizras e l’Uniun svizra da las dunnas catolicas SKF.
