Nagin sustegn dal Cussegl naziunal per l'iniziativa populara «Gea ad in scumond d'experiments cun animals ed umans». Bain èn las fracziuns da l'avis che l'intent da l'iniziativa saja giustifitgà. In scumond absolut d'experiments cun animals è dentant per tuts memia radical.
L'iniziativa pretenda che quels vegnian taxads en la constituziun sco torturas e delicts. Products novs u existents per ils quals igl è vegnì fatg experiments cun animals duain ni dastgar vegnir importads ni exportads ed il commerzi cun quels duai medemamain vegnir scumandà. Era la sanestra, ils verds ed ils verd-liberals renvieschan l'iniziativa, pretendan dentant cuntrapropostas.