Las canortas n’han betg stuì serrar lur portas sin cumond dal Cussegl federal. Plirs oraturs han dentant fatg attent che blers geniturs n’hajan betg pli tramess lur uffants, quai per tema dal coronavirus. Qua tras manchian a las canortas ussa entradas uschia che bleras sajan en difficultads finanzialas. Sch'ins na veglia betg periclitar las investiziuns che chantuns e la Confederaziun hajan fatg ils ultims onns ella tgira d’uffants ordaifer la famiglia dovri era qua sustegn statal. Gia annunzià sustegn ha il chantun Grischun. El metta a disposiziun in milliun francs per canortas en miserias.
280 milliuns per la cultura
Plinavant ha la maioritad da la Chombra gronda decidì da na betg reducir las contribuziuns da sustegn per la cultura. En tut stattan ussa a disposiziun 280 milliuns francs. Cun quels duai en emprima lingia vegnir gidà interpresas, artistas ed artists sco era uniuns culturalas che han pervia da las mesiras dal Cussegl federal stuì annullar occurrenzas e che han perquai expensas ed entradas che mancan.
