En vista a la sessiun extraordinaria che cumenza il glindesdi a Berna sa posiziuneschan las fracziuns. La PPS ha preschentà la sonda lur puncts principals per la sessiun da l'autra emna. Tranter auter duai il Cussegl federal a partir dad immediat desister d'intervenziuns tar l'economia. Daners stoppian uss vegnir repartids entras il parlament.
La pli gronda fracziun en il parlament ha plinavant crititgà la Confederaeziun pervia da las restricziuns rigurusas da las ultimas emnas. Il privel da la pandemia saja vegnì survalità - la catastrofa prognostitgada na saja betg arrivada. Ord quest motiv duai il Cussegl federal desister d'in ulteriur lockdown sch'ina segunda unda da corona arrivia. Er la libra circulaziun da persunas na dastgia betg pli vegnir reactivada. Las interpresas duain en emprima lingia emploiar svizzers e svizras senza lavur.
Dapli protecziun per il clima
Ils verd-liberals prendan en mira l'agid statal planisà per la Swiss e l'Edelweiss Las duas societads aviaticas duain survegnir daners sulet sch'i dat dapli cundiziuns per la protecziun dal clima. Er ils Verds fan pretensiuns per dapli protecziun dal clima. Il pachet da sustegn per las societads aviaticas na vegnia betg acceptà senza cundiziuns. Tut investiziuns che la Confederaziun fetschia en il mument per sustegnair la conjunctura stoppian esser supportablas per il clima.
Plinavant duain las persunas ch'èn pertutgadas il pli fitg da la pandemia da corona survegnir ulteriur sustegn. Tranter auter vulan ils Verds che la Banca naziunala distribuescha las reservas da gudogn.
Dapli fatgs, infurmaziuns ed istorgias chattais qua.
