Per autos electrics ston ins en l'avegnir pajar ina taglia d'import, ha decis il Cussegl federal. El ha decis d'annullar la liberaziun da taglia per autos electrics che vala dapi il 1997. La midada da l'ordinaziun correspundenta fa il Cussegl federal sin la fin da l'onn.
Perquai ch'i dat adina dapli autos electrics sin via vul il Cussegl federal cun questa mesira dar cuntrapaisa a perditas da taglia ed augmentar las entradas per la construcziun da vias. Sin il pretsch d'import vala en l'avegnir ina tariffa da taglia da 4%.
Ina liberaziun da la taglia muntas che la Confederaziun na survegness betg 2 fin 3 milliardas francs fin il 2030. Il 2022 haja la Confederaziun gia manchentà gudogns da radund 78 milliuns francs. Cun la liberaziun da la taglia ha la Confederaziun er vulì promover la mobilitad electrica da quai temp. Tenor la prognosa da la Confederaziun na saja quai davent dal 2025 betg pli necessari, damai ch'il pretsch d'autos electrics saja fin lura betg pli pli aut ch'il pretsch d'autos convenziunals.
