Il chantun Genevra rinforza massivamain las mesiras per franar la derasaziun dal coronavirus: A partir da glindesdi saira a las 19:00 vala a Genevra il stadi d'urgenza – quai almain fin ils 29 da november.
Il chantun ha decidì questa mesira pervi da la situaziun precara en il sectur da sanadad. Mintga di dettia 1'000 fin 1'300 novas infecziuns. Sche quest svilup cuntinueschia, vegnia la capacitad dals ospitals surpassada, ha ditg la media chantunala da Genevra, Aglaé Tardin, la dumengia davant las medias.
Restaurants e bars ston serrar. Serrads vegnan però er tut las butias che na vendan naginas mangiativas sco er kinos, teaters, centers da fitness, bogns cuverts e patineras. Pertutgads èn er ils coiffeurs sco er ils saluns da bellezza. Canortas e las scolas restan dentant avertas, sco la regenza dal chantun ha communitgà la dumengia.
Occurenzas privatas u publicas cun pli che tschintg persunas èn scumandadas.
Il venderdi aveva gia il chantun Giura proclamà il stadi d'urgenza.
