Siglir tar il cuntegn

Header

audio
Autoritads appelleschan da betg far viadi en il Tessin
Or da Actualitad dals 08.04.2020.
laschar ir. Durada: 02:11 minutas.
cuntegn

Situaziun en il Tessin Nagin gelato, nagin rustico, nagina pizza

Las autoritads tessinaisas appelleschan a la glieud da betg ir da Pasca en il Tessin. Surtut ils ospitals sajan al limit. Quels na duessan ins betg chargiar anc dapli.

Il Tessin tutga tar ils chantuns cun ils pli blers cass confermads. Vinavant n'èn en nagin auter chantun mortas uschè bleras persunas pervia dal coronavirus. Tenor il medi chantunal dal Tessin Giorgio Merlani sajan ils ospitals en il chantun plaunet al cunfin, surtut sin las staziuns intensivas.

Nus vulain che la glieud da la Svizra tudestga enconuscha nossas vals e nos rusticos enstagl da nossas staziuns intensivas e d'urgenza.
Autur: Giorgio MerlaniMedi chantunal dal Tessin

Perquai appellescha il medi chantunal da desister quest onn da las vacanzas da Pasca en il Tessin. Sch'ins stat a chasa è il ristg d'ina infecziun pli pitschen. Il Tessin saja per il mument betg in lieu da vacanzas. Restaurants, butias ed attracziuns sajan per gronda part insumma serrads.

Cun l'auto enfin Uri per cumprar en

Las Tessinaisas ed ils Tessinais sa tegnan per gronda part vi da las mesiras. Quai constatescha era Bettina Secchi, schurnalista da la gasetta «Tessiner Zeitung». Quai malgrà ch'ils ultims dis, er pervia da la bell'aura, hajan carmalà giuadora dapli glieud. I paria che la glieud perdia in pau la pazienza.

Bettina Secchi
Legenda: Bettina Secchi: La schurnalista scriva per la gasetta tudestga «Tessiner Zeitung». Per RTR scriva ella regularmain per l'emissiun «impuls». RTR, Jérémie Sarbach

Ina regla che vala en il Tessin: Persunas sur 65 onns na dastgan betg ir a cumprar en. Els duessan contactar ils vischins u la vischnanca per far cumissiuns.

Uss: Perquai che betg tuts vulan acceptar quai, han tscherts cumenzà ad ir en il chantun Uri a cumprar en.
Autur: Bettina SecchiSchurnalista

Ils appells da star a chasa èn tenor Bettina Secchi commensurads, surtut perquai ch'ils ospitals han il mument fitg bler da far. Ella haja fatg differentas intervistas cun persunas or da quest sectur e vesì quant bler che quels ston lavurar. Al sistem medicinal na duessan ins betg chargiar si anc dapli lavur.

Controllas al tunnel dal Gottard

La polizia chantunala dad Uri e Tessin han annunzià da far dapli controllas tar il tunnel dal Gottard. Concret vulan els controllar e discurrer cun tut quels che vulan, malgrà ils appells, ir en vacanzas. In scumond da viagiar na datti dentant betg. Els stoppian sperar sin il saun giudizi da la glieud.

RTR actualitad 12:00

Artitgels legids il pli savens

Ir a sanester Ir a dretg