Siglir tar il cuntegn

Header

audio
Solarexpress: Stan actual davart la Confederaziun
Or da Actualitad dals 31.01.2024. Maletg: RTR
laschar ir. Durada: 3 minutas 41 Secundas.
cuntegn

Solarexpress Confederaziun quinta mo cun in potenzial da 1 TWh

Il Parlament federal vuleva augmentar la producziun d’electricitad enfin 2 TWh (uras terawatt). Realistic sajan ussa anc la mesadad, di l’Uffizi federal d’energia BFE.

Els hajan ina glista nua ch'els nodian ils projects per indrizs solars alpins enconuschents ed observian er il svilup da quels. Quai di Leo-Philipp Heiniger, spezialist per energias regenerablas tar l’Uffizi federal d’energia (BFE). Il mument sajan da quai da 50 projects sin questa glista. Circa la mesadad hajan gia survegnì glisch verda dals possessurs da terren e da las vischnancas da domicil. Strusch 10 projects hajan fatg naufragi e tar tschels spetgia el in’emprima decisiun ils proxims mais.

Quai che saja dentant schon ussa pli u main cler: Uschè blera capacitad supplementara da producir electricitad sco quai ch'il Parlament federal haja sperà da pudair crear da nov cun il «Solarexpress» na vegnia betg a dar.

Il cunfin da 2 TWh ha il Parlament federal fixà. Cun ils projects ch’èn ussa enturn na vegnin nus betg a cuntanscher quella cifra. Tut ils projects ensemen han ina producziun spetgada da circa 1 TWh.
Autur: Leo-Philipp Heiniger spezialist per energias regenerablas tar la Confederaziun

Nagin temp per novs projects

Blers novs projects na vegnian era betg pli latiers, manegia Heiniger. Per pudair profitar dal Solarexpress – vul dir dad ina procedura da lubientscha pli simpla ed in sustegn finanzial da la Confederaziun dad enfin 60 % da las investiziuns – ston ils indrizs solars numnadamain gia furnir la fin da l'onn proxim almain 10% da lur capacitad finala en la reit electrica.

Sch’ins tschertga pir ussa novs lieus pudess quai daventar stretg.
Autur: Leo-Philipp Heiniger spezialist per energias regenerablas tar la Confederaziun

Per profitar dal Solarexpress stoppia in project esser exponì enfin la fin da l’onn 2025 e per pudair far quai dovri er in rapport ecologic. Tgi che n’è betg gia vi da la planisaziun saja probabel tard vidlonder.

Ma era per ils projects ch’èn il mument sin buna via pudessi anc dar intgins obstachels, manegia Heiniger. El na manegia betg mo il privel che recurs pudessan retardar tut ubain ch'i pudess dar ina stretga tar ils moduls solars.

Sche tut quels projects cumenzan pli u main il medem mument a construir, è probabel l’entira logistica, la disponibilitad da helicopters ubain interpresas da construcziun spezialisadas il pli grond problem che la disponibilitad dals moduls solars.
Autur: Leo-Philipp Heiniger spezialist per energias regenerablas tar la Confederaziun

Dapli producziun nova en la Bassa

Ils projects per indrizs solars en las regiuns alpinas hajan segiramain lur avantatgs, cunzunt l’enviern. Per Leo-Philipp Heiniger dal BFE èsi dentant impurtant da mantegnair las relaziuns. Er ils Indrizs solars sin ils tetgs en la Bassa produceschian electricitad l’enviern – e quai dapli che quai ch'ins craja.

La construcziun nova d’indrizs solars sin ils tetgs en la Bassa l’onn passà portia circa medem blera electricitad durant l’enviern, sco tut ils indriz ch’èn il mument planisads en las regiuns alpinas, uschia Heiniger. Ed il potenzial na saja anc betg exaust, è el persvas. Era quest onn quinta la branscha cun in augment da la dumonda per indrizs fotovoltaics.

RTR actualitad 12:00

Artitgels legids il pli savens