L'absentissem n'è betg da cumparegliar cun «far il schwänzen». Tar l'absentissem da scola n'è betg la motivaziun d'ir a scola periclitada, mabain èn ils uffants surdumandads. Quai po avair differents motivs, di Sandra Locher Benguerel ord experientscha. L’anteriura cussegliera naziunala grischuna è sezza magistra.
Motivs e responsabladad
Ils motivs èn fitg individuals. Locher Benguerel menziunescha per exempel la sveltezza dal temp e las grondas aspectativas a las scolaras ed als scolars d'ozendi. Questas spetgas pon metter ils uffants sut squitsch, e perfin chaschunar ch'ils uffants na vulan betg pli ir a scola: in pèr dis, emnas u mais. Perquai saja impurtant d'identifitgar ils motivs principals tar ils singuls uffants e reagir cun mesiras adattadas.
La rolla da la magistraglia e dals geniturs
La magistraglia ha ina rolla centrala en l'identificaziun e l'intervenziun tar absenzas da scola, di Sandra Locher Benguerel. Ella accentuescha l'impurtanza da la collavuraziun tranter magistraglia e geniturs. La magistra da Cuira cusseglia als geniturs da tschertgar il dialog cun la magistras u il magister da classa. Geniturs na duain betg avair tema da far quel pass. La soluziun po mo vegnir chattada sch'ils geniturs, las magistras e magisters e las persunas spezialisadas collavuran.
Necessitad d'in monitoring
La magistraglia pretenda tranter auter in monitoring sistematic da las absenzas da scola per chapir meglier la problematica e per sviluppar mesiras. Impurtant saja era che la responsabladad e las cumpetenzas sajan scleridas. In impurtant pass è era da sensibilisar la magistraglia per il problem. Las scolas autas da pedagogia fetschian quai. Impurtant saja dentant ch’era persunas che vegnan engaschadas sco magistras e magisters pervi da la mancanza da persunal vegnan sensibilisads per il tema.
Er en il Grischun in tema
Magistras e magisters en tut la Svizra annunzian in augment dals cas. Ils uffants vegnan adina pli giuvens. Uschia è quai era en il Grischun, di la presidenta da la magistraglia grischuna (LEGR) Nora Kaiser. Els hajan dumandà il chantun per cifras. Il november duain quellas esser sin maisa e lura decidan els sin basa da quellas tge mesiras ch’èn d’introducir.
Sforzs cuminaivels
Tuts involvads – da la politica sur la magistraglia, persunal spezialisà fin tar ils geniturs – èn dumandads da chattar soluziuns cuminaivlas per segirar la scolaziun dals uffants, din tant Nora Kaiser, sco era Sandra Locher Benguerel.