Ils 4 da december 2025 è ella vegnida fundada, l'uniun «Stagiun d'alp viva». Igl è in'uniun che vul promover la stagiun d'alp ch'è dapi il 2023 in patrimoni da l'UNESCO. Peter Küchler, il president da la nova uniun, di che mo il fatg d'esser aifer il patrimoni cultural da l'UNESCO na possia anc betg mantegnair ina tradiziun.
Per quai dovri in'uniun che collia tut quellas persunas ed instituziuns che han da far cun la tradiziun svizra. Quai tranter auter il turissem, l'agricultura, ils museums u era la protecziun d'animals. Bler potenzial da conflict – ma il president sa gia, co ir enturn cun questas tensiuns: «Constructiv – en il senn ch'ins taidla tuts e prenda tuts en la bartga.»
Sper tractar e communitgar differents interess saja in'ulteriura incumbensa da l'uniun da sviluppar vinavant la tradiziun. Ma sviluppar ina tradiziun? Quai para ina cuntradicziun. Ma i saja adina in act da ballantscha, di Peter Küchler.
Questa tradiziun è mo en ils chaus da la glieud. E perquai vegnin nus er ad avair la libertad da sviluppar vinavant questa tradiziun.
In'ulteriura finamira da l'uniun «Stagiun d'alp viva» è quella da cumbatter differents problems, sco la midada dal clima u la mancanza da persunal sin l'alp. Mesiras concretas n'hajan els dentant anc betg, di il president. Far propostas per soluziuns na saja betg sia incumbensa.
«L'uniun ha plitost l'incumbensa, sche auters circuls inoltreschan projects, da giuditgar quests projects e da decider, tgenins che vegnan finanziads», di Peter Küchler. Per onn stattan a disposiziun a l'uniun 45'000 francs da l'Uffizi federal da cultura. Vitiers vegnan 1'000 francs per chantun. La finamira saja che tut ils chantuns svizzers fetschian part da l'uniun – era quels ch'èn anc pli sceptics, sco per exempel Schaffusa.
Per commember vegnan anc 50 francs ad onn vitiers. Il mument n'ha l'uniun dentant anc nagins commembers. Quai saja il proxim pass, di Peter Küchler: Far attent sin la nova uniun e rimnar commembers.