En Svizra hai dà pli pauc naschientschas l'onn passà. En tut èn 82’400 uffants naschì. Quai è bunamain 8% pli pauc cumpareglià cun l'onn 2021 – communitgescha l'Uffizi federal da statistica. Quai munta en media ha ina dunna en Svizra 1,39 uffants. L’onn 2021 era quest dumber anc tar 1,52.
Dapli mortoris tar dunnas
En il medem mument ha l'Uffizi federal da statistica registrà dapli mortoris l'onn passà. En tut én 74'400 persunas mortas, quai che correspunda ad in augment da 4,5%. Suenter ina reducziun l'onn 2021 è il dumber da mortoris puspè s'augmentà l'onn 2022.
Tar las dunnas è l'augment cleramain pli grond che tar ils umens. Il pli fitg è il dumber da mortoris creschì tar las persunas a partir dad 80 onns sco er tar las persunas sut 40 onns. Tar las persunas tranter 40 e 64 onns percunter è el sa diminuì levamain.
En la gruppa da vegliadetgna da 65 fin 79 onns èn ils mortoris tenor schlattaina sa sviluppads en ina direcziun cuntraria: tar las dunnas èn mortas en cumparegliaziun cun l'onn precedent 2,2% dapli, tar ils umens 1,5% damain.
