Malsognas dal cor e da la circulaziun, sco er cancer èn l'onn 2022 stadas las raschuns ch'han manà il pli savens a la mort en Svizra. Sco quai che l'uffizi federal per statistica scriva, èn bun 27% da las persunas mortas en connex cun malsognas dal cor e da la circulaziun. Radund 23% pervi da cancer. Sin plazza trais suondan malsognas da demenza.
Mortoris entras corona èn ids enavos
Covid-19 ha chaschunà totalmain 5,5% dals mortoris ed ha uschia occupà il tschintgavel plaz davos las malsognas da respiraziun (6,1%). Uschia n'è Covid-19 betg pli stada l'onn 2022 tranter las trais raschuns principalas da mortoris.
Las raschuns principalas per ils mortoris il 2022
Pervia da malsognas dal cor e da la circulaziun èn il 2022 morts 9'512 umens (26,1%) e 10’951 dunnas (28,8%). La vegliadetgna media da las persunas è stada tenor il BFS tar ils umens tar 81,4 onns e tar las dunnas tar 87,4 onns. Morts da cancer èn l'onn passà 9'310 umens e 7'910 dunnas, omaduas cun ina vegliadetgna media da 75 onns. Cancer dal lom ha chaschunà ils pli blers mortoris.
Demenza sin rang trais
L’onn 2022 èn vegnids registrads 6'546 mortoris pervia da demenza (8,8%). Pertutgà eran 2'047 umens en media 86 onns e 4'499 dunnas en media cun 89 onns.
Dapli mortoris en il traffic sin via
L’onn 2022 è il dumber da mortoris en il traffic sin via s’augmentà: Igl èn mortas en tut 233 persunas – 173 umens en la vegliadetgna media da 54 onns e 60 dunnas en la media da 53 onns. En cumparegliaziun cun l’onn 2021 correspunda quai tenor il BFS tar ils umens ad in augment da 13% e tar las dunnas schizunt a 71%.
Pli paucs suicidis
Ils suicidis percunter èn sa reducids levamain l’onn 2022. Tar las dunnas eran quai 263 persunas (vegliadetgna media 54) e 695 umens (vegliadetgna media 58).
