Suenter il stemprà dad ier han las lavurs da rumida cumenzà a La-Chaux-de-Fonds. Anc adina èn enturn 200 chasadas senza forza electrica. Tenor la polizia possia il traffic sin las vias principalas vegnir garantì. Pliras colliaziuns da tren saja dentant anc adina interruttas. Quant grond ch'ils donns materials èn na sa lascha anc betg dir exact. L'assicuranza AXA discurra dentant d'ina vehemenza extraordinaria.
In stemprà violent ha tutgà il glindesdi vers las 11.30 la citad da La Chaux-de-Fonds. Ina persuna è morta en consequenza, radund 40 èn vegnidas blessadas. Il stemprà è arrivà cun in suffel da stimà 217 kilometers l'ura, tenor emprimas infurmaziuns.
Situaziun sut controlla
La Chaux-de-Fonds vegnia ad avair fastizs permanents dal stemprà, ha ditg il president da la citad Jean-Daniel Jeanneret il glindesdi saira avant las medias. La situaziun saja il mument sut controlla. El ha dentant appellà a la populaziun d'esser fitg attenta cun sa muventar tras la citad ubain er en la natira. La polizia ed ils pumpiers cusseglian da desister da viadis a La Chaux-de-Fonds.
La persuna ch'è morta è vegnida sturnida d'ina crana da construcziun ch'è cupitgada pervia dal vent. Quai è schabegià sin la plazza da la staziun, sco la polizia communitgescha. La crana ha tutgà in auto che ha sinaquai cumenzà a brischar. Var 40 persunas senza blessuras zunt gravantas han ins transportà en divers ospitals en l'entir chantun Neuchâtel
Il stemprà a traversà la regiun da las muntognas dal Neuchâtel. Meteo Svizra aveva annunzià malauras sur l'entira regiun da l'Artg giurassian.
Ils donns en la citad amez la regiun dal Giura èn considerabels. Il stemprà ha destruì vehichels, purtà davent tetgs e dal tut mobiglias ch'eran en il liber. Tozzels da plantas han ils suffels violents fatg cupitgar u perfin decapità. Stan mardi saira èn 1'600 hectaras guaud e radund 4'000 chasas donnegiadas. Quai munta a donns da radund 70 fin 90 milliuns francs.
Reacziun dal president da la Confederaziun
Alain Berset è s'annunzià paucas uras suenter il stemprà via Twitter. «Ils maletgs da La Chaux-de-Fonds, devastà tras il stemprà laschan smirvegliar nus», ha el scrit. Ses patratgs sajan tar las persunas tutgadas tras las malaura, sco era tar la glieud engaschada en favur da la populaziun.
Tge è propi capità sur La Chaux-de-Fonds
Sabine Balmer da SRF Meteo ha prendì posiziun, sch'il stemprà saja stà in tornado. Indizis per in tal fenomen na dettia fin uss anc betg, ha ella manegià. La sveltadad da vent 217 kilometers per ura n'è anc betg confermada, i fiss dentant la pli auta sveltadad mesirada fin uss.
Traffic da viafier interrut
En consequenza dal stemprà en las colliaziuns da tren da La Chaux-de-Fonds cun Neuchâtel, Bienna e Le Locle vegnidas stritgadas. En plirs lieus èn plantas ed er ina pitga d'auta tensiun cupitgadas sin ils binaris. Scoi vesa ora, pudessan tschertas colliaziuns restar serradas plirs dis fin emnas.
