Giuvenils e giuvenilas pli veglias s'engaschan plitost che pli giuvens e quels en territoris urbans plitost che giuvenils en la champagna. A questa conclusiun vegn in studi per incumbensa da la cumissiun federala per uffanza e la giuventetgna. Plinavant giogan la furmaziun e la schlattaina ina rolla: giuvenils cun ina pli auta furmaziun sa participeschan pli savens. E mattas e dunnas giuvnas plitost ch'ils buobs ed umens giuvens.
En ina retschertga online han bunamain dus terzs dals giuvenils inditgà ch'i mainian discussiuns davart temas politics en famiglia u en il ravugl d’amis. Bunamain la mesadad ha ditg ch'i sa participeschian a votaziuns ed elecziuns. In resultat ch'ins sto dentant relativar, cunquai che autras retschertgas mussan che mo gist in terz da las persunas sut 25 onns sa participeschan en media a las votaziuns en Svizra.
Engaschi en medias socialas
Ina rolla impurtanta giogan era las furmas digitalas da la participaziun politica. La mesadad di, ch'i hajan gia fatg 'il liken' artitgels u commentaris en las medias socialas e da quai da 40 suondan era persunas, organisaziuns u moviments politics en l’internet.
Il svegliar l'interess per la politica giaja maun en maun cun la furmaziun politica, scrivan ils auturs dal studi. Natiralmain ch'i dependia era dal tema, sch'ins è sez pertutgà u da l’interess sch'ins s'engascha. Dentant sa sentian giuvnas e giuvens savens surdumandads en dumondas politicas perquai ch'i sappian memia pauc co las instituziuns ed ils instruments politics funcziunian en Svizra. Quai haja per part era da far cun la moda e maniera co i vegnia discutà e scrit davart la politica en Svizra.
Dapli furmaziun politica en scola
I dovria perquai dapli e meglra furmaziun politica en scola e quai sur tut ils stgalims ora. Impurtant è tenor ils giuvenils dentant sper l’infurmaziun davart il sistem politic era da pudair emprender da discussiunar ed argumentar e da furmar in atgna opiniun. Quai saja central, furmian quellas abilitads il fundament da la democrazia.
