La midada dal clima è il tema che fatschenta la giuventetgna il pli fitg. 40% da las persunas tranter 15 e 25 onns s'interessescha il pli fitg per quest tema. Quai demussa il monitor politic represchentativ dad Easyvote 2022, in'enquista da l'institut da perscrutaziun gfs Berna.
Moviments n'èn betg pli uschè attractivs
En general vulan pli paucas persunas s'engaschar persunalmain en la politica en il futur (40%). E moviments politics han pers blera attractivitad. 36% chattan che moviments sajan la suletta via da muventar insatge (in minus da 16%). Da l'autra vart na chapeschan 29% betg daco ch'ins s'engascha en in moviment (in plus da 11%).
Ils auturs da la enquista scrivan che la chauma da clima, la chauma da dunnas ed la pandemia hajan fatschentà bleras giuvnas e blers giuvens, e quai giaja uss enavos.
Tge fatschenta uschiglio anc?
Sper la midada da clima fatschenta er la politica naziunala e la politica d'economia. Pli pauc guardan ils giuvens e las giuvnas sin la politica davart l'UE, la politica da migraziun. Il pli pauc fatschenta la dischoccupaziun ed il provediment per la vegliadetgna.
86% da las persunas dumandadas han inditgà da vulair sa participar a las proximas votaziuns. Quai èn uschè bleras sco anc mai dapi il cumenzament da l'enquista avant set onns.
