Dapli persunas pensiunadas che giuvnas, quai vegn probabel ad esser il cas en il futur en las valladas grischunas. Persunas sur 65 onns s'engaschan dentant savens anc voluntariamain. In'enquista da la Scol'auta spezialisada dal Grischun mussa che bun la mesadad s'engascha gia e 73% pudessan s'imaginar da s'engaschar sin basa voluntara.
Er sche gia 44% da las persunas tranter 54-74 s'engaschan en Svizra, dettia anc potenzial. Cunzunt la communicaziun tranter vischnancas e populaziun na para tenor il studi betg da funcziunar optimal. Bleras persunas na sappian betg tge purschidas per engaschaments ch'i dettia en lur vischnancas.
Vesair il potenzial
Per optimar quai, duai il studi sensibilisar las vischnancas per quest fatg e cunzunt mussar a lezzas ch'i dess anc bler potenzial che na vegn betg nizzegià. Tenor ils auturs dal studi duain las vischnancas gidar ils acturs impurtants da sa colliar. Pia manar ensemen interpresas, politica ed uniuns e tschertgar ensemen ideas.
Sper quai han ils auturs era anc elavurà ina uschenumnada «toolbox» che duai sustegnair las vischnancas cun workshops d'elavurar schliaziuns per il futur per nizzegiar anc meglier il potenzial. Era en quest process è l'idea da laschar far part ils seniors e las senioras.
En il studi è era vegnì dumandà, nua che las senioras ed ils seniors pudessan s'imaginar da s'engaschar. E qua sa mussa ch'i dat preferientschas:
L'engaschi sin basa voluntara na possia betg mo servir a la societad. Uschia pon persunas pensiunadas er avair dapli contacts socials e chattar novas rollas en la societad. Er cunter isolaziun en la vegliadetgna possia quai gidar. Malgrà che la gronda part dals dumandads e las dumandadas ha inditgà ch'els sa sentan bain integrads en las vischnancas.
40% da las persunas che han fatg part a l'enquista han plinavant inditgà ch'els fissan era stads pronts dad anc lavurar suenter la pensiun.