Siglir tar il cuntegn

Header

cuntegn

Studi Pisa 2022 Ils giuvenils svizzers da 15 onns èn chanuns da la matematica

Al studi Pisa che cumpareglia las prestaziuns en scola en divers pajais, èn sa participadas radund 7’000 scolaras e scolars. Dasper valitar il savair dals roms matematica, leger e scienzas natiralas – porta il studi era aspects sco il sa sentir durant la pandemia da corona ed il tema mobing.

Las scolas dad 81 pajais cumpareglia il studi Pisa 2022. En Svizra han las scolaras ed ils scolars da 15 onns fatg in fitg bun resultat tar la matematica, cun en media 508 puncts. Quai communitgescha la Conferenza da las directuras e dals directurs chantunals da l'educaziun publica.

Cun ils 508 puncts saja la Svizra sin rang 8 da tut ils pajais participants. Sin ils emprims rangs sajan sis pajais asiatics e l’Estonia. Ils ulteriurs 73 pajais èn cleramain davos la Svizra.

Il podest da matematica

  1. Singapur (575)
  2. Macao-China (552)
  3. Taipei-China (Taiwan) (547)
  4. Sumegliant als davos studis

La prestaziun da leger intermediara dals giuvenils da 15 onns è sumeglianta als resultats dals studis 2015 e 2018. Il medem vala per il resultat en il sectur da las scienzas natiralas.

En tut sajan ils resultats dals tests en Svizra da giuditgar positivs, hai num en la communicaziun. Blers pajais ch’eran pli baud avant la Svizra, han fatg tar il studi Pisa 2022 per part resultats cleramain pli flaivels.

Pandemia e mobing

Il studi cuntegn era infurmaziuns davart il temp da pandemia, cun las scolas serradas. Blers giuvenils menziuneschan experientschas d’emprender positivas, ed in bun sa sentir. Patì ha durant quest temp dentant la motivaziun d’emprender.

En cumparegliaziun cun Pisa 2018 expriman las scolaras ed ils scolars en Svizra d’avair vivì damain mobing. Creschì è er il sentiment positiv d’appartegnair a la scola.

audio
Per tadlar: curt e cumpact
ord RTR Audio dals 05.12.2023.
laschar ir. Durada: 1 minuta 1 Secunda.

RTR novitads 12:00

Artitgels legids il pli savens