Il studi vegn realisà en il chantun Son Gagl, cun collavuraturas e collavuraturs dal sistem da sanadad, ha confermà Pietro Vernazza, schefmedi da l'infecziologia da l'ospital chantunal da Son Gagl.
Gia avant sis emnas hajan ins cumenzà a planisar minuziusamain il studi. Tar l'epidemia da Covid-19 dettia differentas dumondas che sajan da sclerir. Ins veglia scuvrir, quantas infecziuns dal virus ch'i haja dà senza sintoms, co la derasaziun en il pievel capitia e tge facturs che possian promover infecziuns e da tge sintoms ch'ils participants raquintan.
Differents sistems per testar
Ils participants dattan giu provas da sang. Els ston era respunder bleras dumondas. Per resultads saja dentant anc memia baud: «Il mument essan nus vid testar las emprimas 1'000 provas», ha declerà Vernazza. En in'emna hajan ins lura ils resultats da la proxima retscha da tests.
Differents sistems da test vegnan cumparegliads in cun l'auter per pudair pigliar conclusiuns precisas. Ils resultats vegnian publitgads pir cura ch'ins saja segir ch'ils resultats sajan er fidabels.
L'Uffizi federal per sanadad coordinescha questa lavur da perscrutaziun, in studi represchentativ per l'entira Svizra, saja en planisaziun.
