La banca gronda ha congualà la cumpetitivitad economica da tut ils chantuns. A la testa da la glista da rangaziun èn bain anc adina ils chantuns Zug, Basilea-Citat e Turitg. Ils chantuns Grischun, Uri, Valais e Giura èn giusum la glista da rangaziun – cun il predicat «capacitad da concurrer moderata». Era la schanza da crescher economicamain dal Grischun vesa l'UBS sco «pitschna».
Tenor il studi haja la banca gronda valità en tut 57 variablas. Quellas duain descriver quant cumpetitivs ch'ils chantuns èn a lunga vista.
Concurrenza da taglia perda impurtanza
La concurrenza d'impostas tranter ils chantuns haja pers impurtanza, uschia il studi. Quai ha surtut da far cun la taglia minimala da l'OECD che la Svizra ha acceptà a l'urna.
Per augmentar l'occupaziun da lavur en in chantun dovria dentant er abitaziuns libras e pajablas. Uschiglio saja quai in dischavantatg.
La cumbinaziun da quests facturs – abitaziuns e taglias – haja procurà ch'intgins chantuns ch'èn davostiers han per part pudì gudagnar terren. Uschia per exempel intgins chantuns da la Svizra orientala e dal nordvest.