Il president da la partida chantunala da la PPS e cusseglier naziunal Andreas Glarner s'annunzia uffizialmain per surpigliar il presidi da la Partida populara svizra. Suenter il cusseglier naziunal turitgais, Alfred Heer è el cun quai il segund candidat per il post. Quai ha confermà Glarner envers l'agentura da novitads Keystone-SDA.
La data per s'annunziar è en sasez scadida il prim da favrer. Fin lura era dentant be Heer s'annunzià uffizialmain sco candidat. La cumissiun da tschertga ha perquai resalvà la pussaivladad da tuttina manar vinavant auters discurs.
Spustà elecziun sin l'atun
Suenter la schleppa che la partida aveva survegnì tar las ultimas elecziuns naziunalas l'atun 2019 aveva il president vertent Albert Rösti annunzià da sa retrair. Pervi da la crisa da corona aveva la radunanza da delegads, nua ch'i fiss stà d'eleger in successur ils 28 da mars, stuì vegnir spustada. En vista a la situaziun extraordinaria era Rösti sa declerà pront da restar en uffizi.
Da chattar in successur è stà grev. Per l'uffizi intensiv e betg pajà hajan ins dapi december be survegnì desditgas. Refusà da surpigliar la plazza han tranter auter la cussegliera naziunala grischuna Magdalena Martullo-Blocher, il schef da fracziun Thomas Aeschi (ZG) e la cussegliera naziunala da la Turgovia Diana Gutjahr. Er il cusseglier naziunal dal Sviz e pur Marcel Dettling ha ditg na.
Las proximas radunanzas da delegads han lieu ils 22 d'avust ed ils 31 d'october.
