Siglir tar il cuntegn

Header

cuntegn

Successiun da Michael Lauber Discussiuns cuntraversas en la cumissiun da dretgira

Tar la fatschenta tgi che succeda al procuratur public general Michael Lauber èn il mument anc dus candidats en la cursa. Quai ha la cumissiun da la dretgira dal parlament decidì la mesemna. Retschertgas da SRF mussan, che la discussiun en la cumissiun saja stada cuntraversa. Intgins commembers hajan vulì cumenzar a nov la procedura da tschertga, quai saja dentant vegnì refusà.

Tenor SRF hajan bleras commembras e commembers dubis davart in dals candidats, numnadamain Olivier Jornot, procuratur public dal chantun Genevra. Els crititgeschian surtut il caracter da Jornot. I dettia rinfatschas, ch'il procuratur da Genevra haja surpassà cunfins envers dunnas. Jornot è er schon vegnì admonì pervia da ses cuntegnair envers persunas subordinadas ad el.

Tgi ch'è il segund candidat, ch'è anc en la cursa, n'è dal rest anc betg enconuschent.

Olivier Jornot, procuratur public dal chantun Genevra.
Legenda: Olivier Jornot, procuratur public dal chantun Genevra. Tenor SRF hajan bleras commembras e commembers dubis davart el. Keystone

Co vai vinavant?

La cumissiun da giustia ha communitgà, ch'els vulan en duas emnas decider, sch'els proponan al parlament in candidat. Fin là datti anc discurs cun ils candidats. Igl è pia er pussibel, ch'els na proponan nagin candidat – e cumenzan da nov cun la tschertga d'in successur da Michael Lauber. Lura sa sposta l'elecziun dal nov procuratur general da la Confederaziun sin la primavaira.

RTR novitads 12:00

Artitgels legids il pli savens

Scrollar a sanestra Scrollar a dretga