Suenter set onns sco secretaria generala dal Center surpiglia Gianna Luzio ina nova sfida. Il Cussegl federal ha elegì la Surmirana sco nova directura da l'Uffizi federal da communicaziun. Quai ha il cusseglier federal responsabel Albert Rösti ditg oz avant las medias.
Gianna Luzio haja tenor il Cussegl federal tut las cumpetenzas necessarias per quest post. Ella haja blera experientscha en la politica ed administraziun federala. Plinavant haja ella – grazia a ses differents uffizis d'enfin qua – ina gronda rait da contacts en la politica, administraziun e communicaziun. E sco secretaria generala dal Center enconuschia ella las sfidas e schanzas en la branscha da medias, telecommunicaziun, posta e digitalisaziun. Plinavant discurra ella tut las linguas naziunalas.
Gianna Luzio è creschida si a Savognin. Gia durant ses studi da geografia ed economia publica è ella stada manadra da producziun tar il festival cultural Origen. Suenter ha ella lavurà per il parlament a Berna ed en l’administraziun federala – tranter auter sco cussegliadra dad Alain Berset, minister da l’intern. Il 2018 è ella daventada secretaria generala dal Center (lura anc PCD). Il matg 2025 ha ella annunziada da sa retrair da quest post.
La Surmirana è dasperas co-presidenta da la Lia Rumantscha e presidenta dal Museum alpin svizzer.
Tar las incumbensas da Gianna Luzio vegnan ad esser da definir e mantegnair in service public da medias en Svizra (radio e televisiun). Plinavant vegn la Posta – che cumbatta cun adina pli paucas chartas e cun sfidas logisticas – ad esser ina sfida per ella. Er la relaziun da la Svizra, sias leschas e plattafurmas digitalas internaziunalas sco Meta u Google vegnan a duvrar si'attenziun.
Luzio: «Cumbinaziun da tempo e durabladad è motivanta»
Sco che Gianna Luzio ha ditg avant las medias, sa legra ella da surpigliar quest uffizi. I saja «tant in'onur, sco er in'obligaziun». Las incumbensas dal BAKOM sajan influenzadas da la digitalisaziun e da sfidas economicas. Questa midada da structura saja ina sfida, ma porschian er schanzas. Per surmuntar quellas sfidas dovria tant lavur svelta, dentant er durabladad.
Quella cumbinaziun da temp e durabladad motivescha mai.
Sco sia incumbensa enclegia ella da nizzegiar ils avantatgs dals svilups per la societad. Tar las incumbensas dal BAKOM tutgia tenor Luzio er funcziuns impurtantas per la societad e la democrazia – ed ella sa legria gidar a furmar quellas.
Bernard Maissen va en pensiun
Gianna Luzio surpiglia il post dad in auter Rumantsch, Bernard Maissen. El è dapi il fanadur 2020 directur da l'Uffizi federal da communicaziun (BAKOM). La primavaira 2026 vegn el 65 onns e va en pensiun. En sia funcziun è el stà responsabel da realisar e sviluppar la politica da medias e telecommunicaziun en Svizra.
En l'emissiun da videocast «50:50», realisada da RTR e la Somedia ha el dà il mars 2025 in'invista en sia vita professiunala e privata.