Siglir tar il cuntegn

Header

audio
Simonetta Sommaruga sa retira sco cussegliera federala sin la fin da l'onn
Or da Actualitad dals 02.11.2022.
laschar ir. Durada: 3 minutas 6 Secundas.
cuntegn

Suenter 12 onns Simonetta Sommaruga sa retira

La fin da settember Ueli Maurer, uss er Simonetta Sommaruga. Sin la fin da l'onn 2022 demissiunescha er la cussegliera federala da la PS. Quai per motivs persunals.

Suenter 12 onns en uffizi sco cussegliera federala demissiunescha Simonetta Sommaruga. I saja ina decisiun surprendenta. Sco ch'ella ha ditg, vegnia quella demissiun pli baud che cartì ed haja motivs persunals.

video
Sommaruga: «Mia demissiun vegn in zic abrupt, era per mai, ma jau na poss betg cuntinuar sco enfin uss.»
Or da News-Clip dals 02.11.2022.
laschar ir. Durada: 1 minuta.

Avant in'emna haja ses um gì in culp dal tscharvè e quai haja dà da ponderar bler e mussà ch'ella stoppia ussa metter sias prioritads en in auter lieu. Ella na possia betg cuntinuar uschia sco enfin qua, ha Sommaruga ditg durant ina conferenza da medias a Berna.

Ils davos 12 onns era adina mes uffizi la pli auta prioritad en mia vita. Jau hai vivì quella intensitad e preschientscha, tenor mai dovri er quella per quest uffizi. Jau sun enfin la fin gugent cussegliera federala.
Autur: Simonetta Sommaruga cussegliera federala

Engraziaivla per ses 12 onns en uffizi

Sco che la dunna da 62 onns ha ditg vinavant, saja ella fitg engraziaivla per ils 12 onns ch'ella ha pudì esser part dal Cussegl federal. Cunzunt il fatg ch'ins haja adina puspè tschertgà e chattà cumpromiss haja plaschì ad ella. Sommaruga ha er accentuà ch'ella saja ferm persvadida dal Cussegl federal sco furma per chattar, a basa da differentas opiniuns, soluziuns intelligentas. E betg da far be quai che in u l'autra chatta per bun. Tuts stoppian far in pass in vers l'auter. Quai saja impurtant en quest uffizi sco cussegliera federala en Svizra. Ella engrazia plinavant cunzunt a ses um, sia famiglia, ses amis ed amias, a tuts e tuttas ch'èn stads ina part da ses viadi politic sco era a l'entir Cussegl federal ed a la populaziun per il sustegn e la fidanza durant ils ultims onns.

video
Sommaruga: «Jau engraziel a tuts che han accumpagnà mai durant quels onns.»
Or da News-Clip dals 02.11.2022.
laschar ir. Durada: 55 Secundas.

Las davosas emnas sajan stadas intensivas. Ella veglia uss dentant anc lavurar cun plaina forza vi dals projects averts e cunzunt preparar ina buna surdada a sia successura u ses successur. Quella u quel duai medemamain vegnir elegì ils 7 da december ensemen cun il successur u la successura dad Ueli Maurer che ha annunzià la fin da settember sia demissiun.

Simonetta Sommaruga

Avrir la box Serrar la box
Simonetta Sommaruga a chaschun d'ina conferenza da pressa
Legenda: Dapi il 2019 è ella parsura dal Departament federal d'ambient, traffic, energia e communicaziun (UVEK). Keystone

Il 2010 è la dunna, oriunda da Sins en il chantun d'Argovia vegnida elegida en il Cussegl federal. Là ha ella manà fin il 2018 il Departament federal da giustia e polizia (EJPD). Il 2019 ha ella surpiglià il Departament federal d'ambient, traffic, energia e communicaziun (UVEK). En ses 12 onns en il Cussegl federal ha ella presidià quel duas giadas, il 2015 ed il 2020.

Ulteriuras staziuns da la dunna da 62 onns:

  • scolaziun sco pianista al conservatori da Lucerna
  • mainafatschenta e presidenta da la Fundaziun per la protecziun da consuments (1993 - 2010)
  • cussegliera communala a Köniz (1997 - 2005)
  • cussegliera naziunala (1999 - 2003)
  • cussegliera dals chantuns per il chantun da Berna (2003-2010)

Simmonetta Sommaruga è maridada cun il scriptur Lukas Hartmann. En ses temp liber legia ella gugent belletristica, durant l'enviern suna ella gugent clavazin e la stad passenta ella gugent temp en curtin u sin sendas da viandar.

In sguard sin sia lavur

Sco gronds projects durant ses temp en il Cussegl federal ha Simonetta Sommaruga tranter auter numnà ils process pli svelts per dumondas d'asil, la modernisaziun dal dretg civil e da famiglia. Er la maisa radunda tar il tema forza idraulica u ses engaschament per l'egualitad da las pajas e la quota da dunnas èn tenor la cussegliera federala partenta terms impurtants da sia lavur.

Spezialmain a cor è er stà ad ella ch'il Cussegl federal saja finalmain s'exculpà tar ils uffants internads e ch'ins haja uschia cumenzà ad elavurar questa istorgia.

Plinavant ha la ministra d'energia accentuà ch'il Cussegl federal haja reagì ad uras e che la Svizra saja bain preparada per ina eventuala mancanza d'energia il enviern.

Or da l'archiv

video
Elecziuns dal Cussegl federal ils 22 da settember 2010
Or da Telesguard dals 22.09.2010.
laschar ir. Durada: 2 minutas 22 Secundas.

RTR novitads 15:00

Artitgels legids il pli savens

Scrollar a sanestra Scrollar a dretga