Rimnar bleras infurmaziuns, intratschar uschè blers pertutgads e pertutgadas sco pussaivel e lura furmar in cumpromiss – uschia pudessan ins descriver la moda e maniera da lavur da Simonetta Sommaruga sco cussegliera federala. Magari ha questa «metoda Sommaruga» funcziunà, magari però er betg.
Sco tar mintga commembra e commember da la regenza è la bilantscha a la fin in pau maschedada. Sco success pon ins taxar la refurma d'asil ch'ella ha realisà cun proceduras pli spertas. Plinavant era ses engaschi per l'egualitad dad um e dunna. Saja quai ussa tar las pajas ni era tar la represchentaziun ellas interpresas. Ina clara terrada ha ella stuì magunar ella politica d'ambient, quai cun il na da la populaziun a la lescha da CO2.
Sut il stritg resta dentant enavos il maletg dad ina politicra engaschada, cun in cler focus sin gistadad ed egualitad, ch’è restada fidaivla a ses cumpass politic persunal. Ina persunalitad che ha tegnì aut las instituziuns e che ha maina pers la confidenza en la fermezza da la collavuraziun sur ils cunfins ideologics ora.
Adrian Camartin
Correspundent Chasa federala
