Suenter che novs appels a violenza per questa dumengia saira han fatg la runda en medias socialas, è la polizia da la citad da Son Gagl attenta. Sco quella ha annunzià la dumengia suentermezdi, vegnian ils policists a far controllas da persunas extendidas ed a trametter davent persunas che veglian far craval sco er persunas che sajan per spir mirveglias en citad.
Controllas en l'entir center da Son Gagl
Cun talas controllas da persunas saja uss da far quint en l'entir center da la citad, hai num en ina communicaziun. Tgi che saja gia vegnì tramess davent da la citad il venderdi, stoppia tar ina controlla far quint cun ina denunzia. Er vinavant vegnia la polizia betg a tolerar violenza u il donnegiament material.
Appel er als geniturs
La regenza da la citad e la polizia han appellà a la populaziun da betg suandar ils cloms a violenza, er betg per ir a guardar. L'appel è er drizzà als geniturs. Quels duajan impedir che lur uffants giajan la dumengia saira a Son Gagl. I dettia metodas pli paschaivlas per far attent sin las dumondas dals giuvenils, hai gì num.
La notg da venderdi sin sonda avevan 200 fin 300 persunas fatg craval a Son Gagl ed attatgà la polizia.
