Tar l'attatga da hackers sin la firma d'IT «Xplain» èn er datas dal sistem d'infurmaziun da hooligans da la polizia federala (Fedpol) sa tschentadas en il darknet. Pertutgadas sajan 766 persunas. Quellas vegnian ussa infurmadas direct, sco quai che la Fedpol communitgescha.
Las datas ch'èn otg onns veglias cuntegnan infurmaziuns davart persunas ch'èn sa participadas ad occurrenzas da sport cun violenza e ch'èn vegnidas sancziunadas. Infurmaziuns davart ils delicts u las mesiras na sajan però betg cuntegnidas en las datas. Co che questas datas èn vegnidas tar la firma Xplain vegnia ussa intercurì, uschia la Fedpol.
Chattà las datas han ins tar ils scleriments ch'ins ha fatg suenter l'attatga da ransomware sin l'interpresa da servetsch dad IT Xplain. Era il Fedpol è client da l'interpresa.