Engelberg n'è betg pli isolà dal rest dal mund. I dat in sviament. Quai communitgescha la Polizia chantunala da la Sutsilvania. Suenter ch'igl ha pluvì la sonda saira intensiv en la Svizra Centrala è ina bova ida giu sin la via tranter Wolfenschiessen ed Engelberg e quella ha stuì vegnir serrada.
Trens na curseschan dentant nagins tranter Wolfenschiessen ed Engelberg. Tenor la SBB cuzza l'interrupziun almain fin venderdi che vegn. A Wolfenschiessen han radund in tozzel persunas stuì vegnir evacuadas.
Grondas quantitads da plievgia
Tenor SRF Meteo hai pluvì fermamain la notg sin dumengia en bleras regiuns da la Svizra. La pli gronda quantitad da plievgia è vegnida mesirada a Gersau en il chantun Sviz cun 70,3 millimeters aifer in di.
Pervi da la blera plievgia è la situaziun er en la Part Sura Bernaisa tendida. La blera plievgia ha emplenì anc ina giada il Lai da Thun ch'era gia plain. En consequenza è il traffic da bartgas sin il lai sistì per la dumengia.
