Clientas e clients da la Credit Suisse han retratg da lur contos 61 milliardas francs l’emprim quartal da l’onn. Quai resulta dal rapport da gestiun che la banca ha publitgà. Questa deflussiun monetara ha chaschunà che la banca da tradiziun è vegnida en las stretgas. Per evitar in collaps als martgads da finanzas èsi vegnì a la surpigliada sfurzada tras la concurrenta UBS.
Pervi da las amortisaziuns, ch’eran vegnidas ordinadas en il rom da l’acziun da salvament ha la CS fatg sut il stritg in gudogn da passa 12 milliardas francs dal schaner fin il mars.
Co vai vinavant cun la banca gigantica?
Er la UBS preschenta quest'emna sias cifras. Experts spetgan surtut infurmaziuns sco la nova banca gigantica duai vesair or e cun quantas relaschadas ch'i saja da quintar en vista a la fusiun. Tenor retschertgas da la «SonntagsZeitung» na dettia per il mument naginas relaschadas. Anzi, UBS e CS dovrian a curta vista schizunt dapli persunal – quai almain enfin ch’il contract da surpigliada n’è anc betg fixà ed enfin che la fusiun n’è anc betg vegnida lubida dapertut. Fin lura stoppian las bancas vegnir manadas dublamain.
Or da l'archiv
Ils 19 da mars 2023 eri vegnì a la surpigliada istorica en il mund da bancas.
