La SRG SSR planisescha da puspè emetter lur programs da radio via UKW. Quai suenter ch'il parlament ha decidì da prolungar la pussaivladad per radios d'emetter via UKW er suenter il 2026. La terminaziun da l'UKW è atgnamain stada planisada sin ils 31 da december 2026. Cun quella decisiun dal parlament saja la basa sa midada. Desister sin UKW avess be fatg senn, sche tut ils emetturs avessan fatg quest pass sco fixà fin la fin da l'onn 2026, communitgescha la SRG SSR.
SRG SSR aveva terminà UKW la fin dal 2024
La SRG SSR aveva terminà d'emetter via UKW gia la fin dal 2024. Uschia è ella sa tegnida vi da la cunvegna cun la branscha da radios e la Confederaziun d'avant diesch onns. La SRG SSR haja pia fatg quest pass oravant per far pli simpel quest pass als radios privats ch'èn dependents da daners or da reclamas, scriva ella en sia communicaziun.
Suenter che intgins radios privats n'èn però betg pronts da far quest pass, na possia la SRG SSR betg sa lubir da desister sin questa tecnologia da derasaziun ed uschia sin bleras audituras ed auditurs. Il medem mument s'avanza la digitalisaziun dentant vinavant adina pli fitg, perquai vegnia la SRG SSR vinavant ad esser preschenta sin ils chanals digitals e DAB+ – cunzunt per las audituras ed auditurs ch'han gia fatg la midada. Gia oz vegnan 9 da 10 minutas da radio tadlads sur DAB+.
Avant che la SRG SSR po communitgar pass concrets, ston las novas cundiziuns da basa anc vegnir definidas dal Cussegl federal e da l'Uffizi federal da communicaziun BAKOM.
Parlament decida da prolungar UKW
Suenter la decisiun dal parlament sto uss il Cussegl federal elavurar la basa legala persuenter. La terminaziun da l'UKW è actualmain planisada sin ils 31 da december 2026. La moziun pretenda dal Cussegl federal da desister sin quai ed enstagl prolungar las concessiuns actualas. Alternativamain duai la regenza svizra far ina procedura da publicaziun per reparter las concessiuns dad UKW a partir dal 2027. Il minister da medias Albert Rösti ha annunzià en la debatta da far quai exact uschia. Be da prolungar las concessiuns existentas na saja betg pli giustifitgabel.
Il Cussegl dals chantuns è uschia suandà a la decisiun da sia cumissiun predeliberanta. Quella è sa mussada preoccupada suenter che la SRG SSR ha pers audituras ed auditurs da radio suenter avair tschentà giu UKW l'entschatta da quest onn.
Return immediat tar UKW n'è betg pussaivel
In return dals emetturs da radio da la SRG SSR, tar la quala er RTR tutga, sin la derasaziun da radio analoga sur UKW na saja betg pussaivel immediat. Quai conferma l'Uffizi federal da communicaziun BAKOM.
Ils onns 1910 è la tecnologia da radio vegnida adina pli populara per derasar lingua e musica. L'emprima staziun da radio en Svizra tudestga è stada il 1924 la «Radiogenossenschaft Zürich».
Ils 11 da settember 1924 è lura stà il culp da partenza per il rumantsch sin las undas da radio.
Quai è capità durant ils davos 100 onns
RTR ha pudì discurrer cun il directur da l'uffizi – el ha skizzà custs pussaivels per reactivar cumplettamain UKW en Svizra e dat invista en il process pussaivel.
Sch'i vegnia dà enavos ina concessiun da UKW, na possia quella betg pli vegnir admessa. Sche UKW vegnia prolungà, lura vegnia surdà novas concessiuns per l'entschatta 2027. Uschia cuzzassi anc passa in onn, fin che la SRG SSR pudess returnar sin UKW. Sche la SRG SSR tschenta ina tala dumonda, stoppian ins examinar sch'i dettia tut tenor excepziuns – uschia il BAKOM.
