Siglir tar il cuntegn

Header

cuntegn

Sunrise Pli paucas persunas perdan lur plazza

166 enstagl da 180 emploiads ed emploiadas dal concern da telecommunicaziun Sunrise survegnan la disditga. Sco quai ch'il concern ha communitgà, sajan quai radund 6% dal total da plazzas. La procedura da consultaziun haja mussà, ch'i na saja betg d'evitar da relaschar persunal. La gronda part da las disditgas duai dar fin la fin da quest mais. Per las persunas relaschadas datti in plan social.

Daventar pli cumpetitiv

Il november aveva Sunrise annunzià da vulair stritgar 200 plazzas en l'emprim quartal da l'onn nov. Lura aveva discurrì il concern da telecommunicaziun da 180 relaschadas u da 7% da tut las plazzas. La raschun per las mesiras èn che Sunrise vul far pli schlanca la structura da l’interpresa e reducir ils custs.

En emprima lingia duai la reducziun tutgar posiziuns da direcziun e da funcziuns senza contact direct cun la clientella. Funcziuns cun contact direct cun la clientella en ils shops ed en il servetsch cun la clientella na stettian percunter betg en il focus, hai gì num vinavant.

I sa tracta d'augmentar vinavant «la movibladad e la cumpetitivitad al martgà e da tschentar la basa per in creschament stabil en ils proxims onns», di il schef da Sunrise André Krause en ina communicaziun.

Planisà discurs cun il sindicat

Il plan social ch'è vegnì elavurà gia l'onn 2021 en connex cun la fusiun cun UPC mantegnia sia vigur, ha in pledader confermà sin dumonda da SRF. En quel vegnan las collavuraturas ed ils collavuraturs pertutgads da las disditgas sustegnids per exempel tar la tschertga d'ina plazza.

Ultra da quai han ellas ed els survegnì mesiras transitoricas individualas sur in fond. Il plan social resguarda er criteris sco la vegliadetgna ed ils onns da servetsch da las collavuraturas ed ils collavuraturs disditgs.

Ultra da quai è vegnida instradada ina procedura da consultaziun cun la represchentanza da las lavurantas e dals lavurants e cun il sindicat Syndicom. I vegn examinà, sche tschertas stritgadas èn anc d'evitar u sch'i dess autras soluziuns.

Suenter la procedura vegnia Sunrise a decider davart las disditgas. Las relaschadas duain ir en vigur a partir da mez schaner fin il pli tard la fin da mars 2024, uschia che las bleras disditgas duain succeder il schaner, sco ch'i ha gì num vinavant.

audio
Per tadlar: Las novitads dal las 12:00
ord RTR Audio dals 27.11.2023.
laschar ir. Durada: 4 minutas 4 Secundas.

RTR novitads 12:00

Artitgels legids il pli savens