Siglir tar il cuntegn

Header

cuntegn

Surpigliada dat en l'aua Sunrise sto pajar chasti da 50 milliuns francs

Il concern da telecommunicaziun Sunrise ha disditg uffizialmain il contract da cumpra cun UPC. Quai ha communitgà Liberty Global, la possessura da UPC, a Denver, Colorado. Perquai che Sunrise n'haja betg tegnì en il contract, sto il concern uss pajar in chasti convenziunal da 50 milliuns francs.

L’october aveva ina maioritad dals acziunaris da Sunrise fatg opposiziun cunter la surpigliada planisada. Cunzunt han els crititgà ch’il pretsch da cumpra da 6,3 milliardas francs saja memia aut. Er èn els sa dustads cunter l’augment dal chapital d’aczias da 2,8 milliardas francs per finanziar la cumpra. Silsuenter aveva il cussegl d'administraziun ditg giu la radunanza generala extraordinaria il davos mument.

UPC haja prendì enconuschientscha da la disditga dal contract. Els vegnian vinavant a persequitar lur plan da crescher, hai num en ina communicaziun. Sunrise n’ha anc betg prendì posiziun en chaussa.

Dapli gudogn en il terz quartal

Il terz quartal da quest onn ha Sunrise fatg marcantamain dapli gudogn. Quest gudogn ha il concern da telecommunicaziun fatg malgrà il naufragi da la surpigliada cun UPC che ha chaschunà custs supplementars da radund 75 milliuns francs.

Il gudogn saja s’augmentà per passa 50% sin 48 milliuns francs. La svieuta saja s'augmentada per 1% sin 474 milliuns francs. Quai ha communitgà Sunrise. Per l’entir onn da fatschenta quinta il concern vinavant cun ina svieuta da bunamain 1,9 milliardas francs ed in gudogn da fin a 628 milliuns francs sin stgalim EBITDA.

Ord l'archiv da SRF:

Video
Cumbat per la fusiun da Sunrise e UPC
Or da 10vor10 dals 11.10.2019.
laschar ir

RR novitads 06:00