Ils acziunaris gronds da Sunrise han success cun lur opposiziun cunter la cumpra da UPC. En l'ultima minuta ha il concern da telecommunicaziun Sunrise ditg giu la radunanza generala extraordinaria che fiss stada damaun. Il motiv saja ch'ina clera maioritad dals acziunaris che sajan sa registrads per la radunanza na sustegnian betg l'augment da chapital da 2,8 milliardas francs per finanziar la cumpra da 6,3 milliardas francs, communitgescha Sunrise. Ils adversaris crititgeschan en spezial il pretsch da cumpra ed er l'auzament da chapital saja memia aut.
Il president dal cussegl d'administraziun, Peter Kurer, deplorescha questa decisiun. Els hajan investì bler temp en il discurs cun ils acziunaris e sajan vinavant persvas da las raschuns strategicas e finanzialas da la surpigliada. Quella para d'avair fatg naufragi – almain il mument.
RR novitads 07:00
