Siglir tar il cuntegn

Header

cuntegn

Survista Questas schluccadas valan a partir da sonda

Survista da las mesiras.
Legenda: Survista da las schluccadas dal Cussegl federal. RTR Grafica

Obligatori da mascrina: En il liber na vala nagin obligatori da mascrina pli. Quai vala per exempel per terrassas, staziuns da tren u plazzas publicas. Il Cussegl federal recumonda dentant vinavant da purtar mascra, sch'ins na po betg tegnair avunda distanza. Er en biros e scolas na vala nagin obligatori da purtar mascra pli.

Endadens vala vinavant in obligatori da mascrina.

Homeoffice: Enstagl da l'obligatori vala uss ina recumandaziun da lavurar da chasa anora. Ils patruns ston dentant decider sez tge che vala en lur biros.

Gastronomia: Dador na datti naginas restricziuns pli. Endadens ston las persunas dentant vinavant seser. Tranter las gruppas vala vinavant la regla da distanza. Sch'ins na sesa betg vid la plazza sto vegnir purtada ina mascrina. Ina persuna sto dar las datas da contact.

Sport e cultura: Dador na datti naginas restricziuns pli. Endadens ston ins vinavant rimnar las datas da contact. Concerts da chor èn er lubids endadens. Uniuns da musica e chors pon cumenzar normal cun las provas – els ston dentant far contact-tracing.

Fatschentas, studios da fitness, centers da sports e parcs d'aua dastgan puspè avrir senza restricziuns.

Clubs e discos dastgan puspè avrir: dentant mo cun il certificat da covid.

Occurrenzas grondas: Occurrenzas cun passa 10'000 persunas vegnan puspè permessas. Tar occurrenzas nua che tut las persunas han in certificat da covid na datti naginas restricziuns. Occurrenzas grondas cun dapli che 1'000 persunas dovran ina lubientscha chantunala.

Tar occurrenzas senza certificats da corona datti intginas restricziuns. Tar occurrenzas cun obligatori da seser dastgan sa participar maximalmain 1'000 persunas. Sch'i na dat nagin obligatori da seser dastgan sa participar dador fin 500, dadens fin 250 persunas.

Vacanzas: Tgi che vegn ord in pajais da Schengen en Svizra na sto betg pli ir en quarantina. L’obligatori da test vala mo pli per persunas ch’èn anc betg viroladas ni guaridas. La Confederaziun recumonda dentant da mirar tar mintga pajais tge restricziuns che valan.

RTR novitads 14:00

Artitgels legids il pli savens