Ad uffants e giuvenils duain star a disposiziun purschidas da furmaziun rumantschas er en la diaspora. Persunas e famiglias emigradas duain vegnir sustegnidas en il diever da lur lingua. Grazia a la missiva da cultura 2021-2024 dal Cussegl federal sustegna l’Uffizi federal da cultura (UFC) projects rumantschs en dus secturs:
- Projects che promovan d’emprender e consolidar la lingua rumantscha per uffants e giuvenils ordaifer il territori linguistic rumantsch.
- Projects che promovan il diever da la lingua rumantscha.
La noziun diaspora rumantscha sa referescha en spezial a la diaspora extrachantunala, ma er al territori betg tradiziunalmain rumantsch en il chantun Grischun. Quest onn sustegna l’UFC 10 projects cun 276’200 francs. Tranter auter ils suandants.
Cun FMR+ direct tar las lecturas ed ils lecturs
La Fundaziun Medias Rumantschas è dapi l’onn 2020 l’agentura da medias per la Rumantschia cun l’incumbensa da promover il pled schurnalistic scrit. Gia ils onns 2020/21 ha la FMR elavurà in concept strategic per il svilup da la purschida da la FMR. Il project actual nizzegia differents canals digitals per entrar directamain en contact cun las lecturas ed ils lecturs cun la finamira d’augmentar la preschientscha e la visibilitad da la FMR e da ses products schurnalistics. Elavurads vegnan ina newsletter sco er concepts per avrir la plattafurma FMR per ina preschientscha en las medias socialas. La lavur da svilup e la concepziun vegn sustegnida da l'Uffizi federal da cultura cun ina contribuziun extraordinaria da 60’000 francs.
Chalender d’occurrenzas rumantschas
L’Uniun da las Rumantschas e dals Rumantschs en la Bassa vul crear in chalender d'occurrenzas rumantschas che rimna sin ina pagina d’internet a moda centrala e survesaivla las datas d’occurrenzas che dovran il rumantsch sco med u sco tema. La realisaziun d’ina plattafurma «open source» durant ils onns 2022–2023 vegn sustegnida da l'Uffizi federal da cultura cun ina contribuziun da 52’000 francs.
Il Chalender spezial da la famiglia Babulin
Per promover la lingua d’uffants metta la Lia Rumantscha a disposiziun la purschida «kidsfits» per famiglias, canortas, gruppas da gieu e scolinas. En il center da questa purschida è la famiglia fictiva «Babulin» ch’accumpogna ils uffants sco er las pedagogas ed ils pedagogs dapi l’onn 2017. Il chalender spezial dals Babulins porscha activitads ludicas e creativas che promovan in barat rumantsch per uffants, geniturs, mussadras e magistraglia dal stgalim bass en furma da texts, illustraziuns, tips e propostas per far gieus e zambregiar. El sa referescha a dis tematics en il chalender annual sco per exempel il Di da la pasch u il Di internaziunal dals dretgs da l’uffant. Per totalmain 20 dis tematics durant ils onns 2023 e 2024 realisescha la LR mintgamai in pitschen dossier en tut ils idioms ed en rumantsch grischun. La realisaziun da 20 dis tematics per ils onns 2023 e 2024 vegn sustegnida da l'Uffizi federal da cultura cun ina contribuziun da 62’400 francs.
