Siglir tar il cuntegn

Header

audio
Zambregiar d'advent «rumantsch» en canorta a Lucerna
Or da Actualitad dals 21.12.2022. Maletg: RTR
laschar ir. Durada: 3 minutas 20 Secundas.
cuntegn

Uniun Cultura Rumantscha Uffants rumantschs da Lucerna zambregian

L'Uniun Cultura Rumantscha Lucerna organisescha scuntradas per giuven e vegl per promover la lingua ed il contact tranter rumantschas e rumantschs en la diaspora. L'emna passada hai dà in suentermezdi da zambregiar per uffants e quai en in atelier a mez la citad da Lucerna.

Scuntradas per pitschen e grond

Organisà il suentermezdi da zambregiar han Christin Riedi e Flurin Caduff da l'Uniun Cultura Rumantscha Lucerna. L'uniun che vegn sustegnida da la Lia Rumantscha, ha gì il settember in'occurrenza da kick-off per preschentar lur ideas e dapi lura organiseschan els maisas radundas per ils creschids u era suentermezdis da termagliar e zambregiar per ils uffants.

Uffants pon discurrer rumantsch

Ils set uffants, tuts tranter trais ed otg onns, sesan en in rudè e zambregian cranzs d'advent. Uschia pon els passentar intginas uras communablas.

Els che discurran almain cun ina part dals geniturs rumantsch, discurran bain la lingua, mintgatant èsi da pensar in zic pli ditg co ins di per exempel «cola» u «forsch» per rumantsch e mintgatant sa schluita tuttina anc in pled tudestg en. L'impurtant saja dentant ch'els discurrian la lingua era cun auters uffants, di Flurin Caduff.

Trais buobs, quatter buobas ed ina dunna stattan encunter ina paraid alva e tegnan en lur mauns il cranz d'advent.
Legenda: Clau, Alma, Luisa, Christin, Hendry, Victoria, Felix ed Aita (da sanester) cun lur cranzs d'advent. RTR, Carmen Monn

Christin Riedi, ch'è medemamain part da l'uniun ha mess a disposiziun ses atelier ed ils utensils per pudair zambregiar in cranz d'advent. Uschia decoreschan ils uffants ina pitschna platta da crap cun dascha, chandailas e chavels d’anghels.

Las proximas scuntradas han lura lieu l'entschatta da l'onn. Ils 5 da schaner ina maisa radunda per ils creschids ed ils 25 da schaner in suentermezdi da termagliar per ils uffants.

RTR actualitad

Artitgels legids il pli savens

Scrollar a sanestra Scrollar a dretga